هه‌واڵ

کۆمەڵگەکەمان
دوچارى شیزۆفرینیا بووە
حه‌مه‌ی ئه‌حمه‌د ڕه‌سوڵ

پێش ئەوەى بچینە لاى کۆمەڵگەکەمان ، با بزانین شیزۆفرینیا چییە و بۆچی ئەم خەسڵەتەمان خستۆتە پاڵ کۆمەڵگەى ئەمڕۆى کوردییەوە ..؟!
شیزۆفرینیا زاراوەیەکى سایکۆلۆژى –بیانییە و لەدوو بەش پێکهاتووە (شیزۆ) بە ماناى کەرت دێت و (فرینیا) بەماناى کەسێتى دێت ، واتا کەرتبوونى کەسێتى یان شێتبوونى کەسێک دەگەیەنێت .... ئێمەش خەسڵەتى کەرتبوونى کەسێتى و شێتبوون دەدەینە پاڵ کۆمەڵگە هاوچەرخەکەمانەوە و پاس و و پاسادانیشمان پێیە بۆ راست و دروستى قسەکانمان !
بێگومان بەراوردکارییەکى زانستى لەنێوان کۆمەڵگەى دوێنێ و ئەمڕۆدا ئەو گۆشە نیگ و بڕیارە بەئێمەیەکى پسپۆڕ لەکۆمەڵناسیدا دەبەخشێ .
بەشێوەیەکى گشتى و وەکو پرەنسیپێکى سەرەکى هەر کۆمەڵگەیەک کۆمەڵگە لەهەرە سادەترین پێناسەید و ئەرکى بنەڕەتى کۆمەڵگەیە کە تاکەکانى ، هەروەها ئەندامى خێرانەکانى گرد بکاتەوە و بە کاریگەرى پەیوەندییەکى کۆمەڵایەتى ساغڵەم و پتەو و سەقامگیر لەژێر سایەى یاس و رێسادا کۆیان بکاتەوە ...!
کەواتە ئەرکى یەکەمینى کۆمەڵگە ئەوەیە ، کەتوێژ و چین و گروپ و خێزان و تاکەکانى هانبدات پێکەوە بژین ، کەبتوانن کۆ هەبوون و کۆ ژیان و کۆ کردار و کۆ هەڵوێست و کۆ مەرگیش بۆ تاکەکانى بپارێزێت و لە بۆتەیەکى سیستماتیکى و دینامیکیدا تواناى هەناسەدانیان بەئازادى و بەیەکسانى و بەتەبایی پێ ببەخشێت ... هەروەها ئەرکى کۆمەڵگەیە کەئێمەى مرۆڤ و ئەندام و تاک و هاوڵاتى لەبۆتەى پڕ خۆشەویستى و میهرەبانى و سۆزدارى خۆیدا کۆ بکاتەوە ، لەکایەکانى خۆیدا بە بەرنامە و پرۆگرامى نەخشە بۆ کێشر و ، پۆلێنمان بکات و بەسەنتەر و چەقی خۆیەوە بمانبەستێتەوە ...!
کۆمەڵگە قەوارەیەکە ، شوێنى کۆمەڵایەتى و پایەى شی و بەتاکەکانى دەبەخشێ و گروپی جود و ئەتنى جیاواز و مەزهەبى وێکنەچوو لە ژێر ساپیتە و سەیوانى خۆیدا کۆ بکاتەوە ، کەشوهەواى لەبار و بارگاوى بەئازادى و دیمۆکراسی و کولتوورى لێکبووردن و ئاشتى و پێکەوە ژیان بڕەخسێنێ بۆ ئەوەى گەشەکردنى ئابوورى و بەرز بوونەوەى ئاستى رۆشنبیرى و فەرهەنگیی بخەمڵێت .!
ئێمەى کورد لەبیرەوەرى و خەیاڵماندا کۆمەڵگەیەک خۆى نوومایش دەکات (کەسەرەڕاى تۆتالیتارى سیاسی و حوکمى دیکتاتۆرەکانى )هێمنى و ئاسوودەیی فەراهەم کردبوو ... رەسەن بوو ، بەرهەم هێنەربوو ، تاکەکان ئۆمێدیان بەژیان هەبوو ، رێز و خۆشەویستى لەنێوان ئەندامانى خێزانیدا بەرکەماڵ بوو ... متمانە و باوەڕ بەخۆبوون و متمانەش بەخەڵکى و بەئایندە لەو پەڕیدا بوو ( سەربارى ئەوەش لە شەڕ و جەنگ هەمیشە ئامادەبوو !!) .
کۆمەڵگەى کوردى دوێنێ ، بەردەوام لەهەوڵدابوون ژیان سادەبێت و خەڵکى (لاسایی) سادەیی و ساکاریی یەکتر بکەنەوە ... تەبایی و برایەتى و یەکسانى و ناجیاوازى بناغەبوو بۆ دەستەبەرکردنى پەیوەندى نێوانیان کۆمەڵگەى سادەبوو ، شۆڕشی تەکنۆلۆژى بەرپانەبوو بوو ،
تاکى کوردیش پێداویستیەکانى کەمتربوون ، قەناعەت کۆڵەکەى بنەڕەتى بوو بۆ کارکردن و خێزان پێکەوەنان ، کەس ئیرەیی بە کەس نەدەبرد ، چاوچنۆکى و هەڵپەکردن و پارەى زۆر پەیدا کردن نەبووبووە دروشمى پیرۆزى هیچ کەسێک ... بۆیە تاکى کوردى دوێنێ غیرەتى نەفسی بەرزبوو ... بەپارەوە نەیدەنازى و کەش و فشی نەدەکرد بەسەیارە و مۆبایل و ڤێلاکەیەوە ... رەوشت و مۆراڵ گرنگترین خاڵێکى مەبدەئی بوو لاى تاکى کورد .... راستگۆیی و وەف و دڵسۆزى و دڵپاکى و دەستپاکى بریتى بوو لەخەسڵەتى بنەڕەتى کەسێتى کورد ..!
بەڵام ئەمڕۆ کۆمەڵگەکەمان ، بەزەبرى باهۆزى جیهانگیرى و هەلومەرجى سیاسی و پەتاى گەندەڵى سیاسی و ئیدارى و ئەخلاقی لەلایەک و بوژاندنەوەى ئابوورى و هەڵڕژانى دۆلار بەدەفتەر و بەفەردە و بەتانکەر هۆیەکانى گۆڕانکارى و وەرچەرخانى کایەى کۆمەڵایەتى ناکاو و ناوەخت و سەپێنەرى بەدواى خۆیدا راکێشاوە ..!
ئەمڕۆ کۆمەڵگەکەمان بەئەرکى پێچەوانەى خۆى هەڵدەستێ ، هۆکارى ململانێ و کێشمە کێشمى نێوان توێژ و چینەکان لەو پەڕیدایە کەبە فاکتەرى لاساییکردنەوە و چاولێکەرى پەت و نەخۆشی شیزۆفرینیاى بڵاوکردۆتەوە ... پەرتەوازەیی و جیاوازیخوازى و لێکترازانى لێکەوتۆتەوە بەرژەوەندى تایبەتى –ئابوورى بۆتە پێوەر و بناغە بۆ پەیوەندى بەستن و پێکەوە ژیان .. کەناڵەکانى لاساییکردنەوە ئامادەن بۆ سەلماندنى خود ، پلەو پایە و ساماندارێتى مەرجى یەکەمە بۆ سەلماندن و بۆ خۆسەپاندن و گێڕانى رۆڵى گرنگ لەکۆمەڵگەدا .. بۆ ئەم مەبەستەش چاوچنۆکى و هەڵپەکردن و ئیرەیی (بەغیلى بەیەکتربردن ) زاڵ بووە بەسەر بیرکردنەوەى کۆمەڵایەتى و حاڵەتى و حاڵەتى دەروونى تاکى کوردا ... پارە پەیداکردن بەهەموو شێوازەکانییەوە بۆتە غەریزە و بۆتە خوو ... تاقە بابەتێک کە لەهزر و زهنییەتى مرۆڤى کوردا برە و و چێژى هەبێت پارە و سامان کۆکردنەوەیە ... هەموو لاسایی یەکتر دەکەنەوە و پونتى پێشبڕکێ و بەربەرەکانى و ململانێی نێوان تاکەکان ، خۆ دەوڵەمەندکردن و خۆ نوومایش کردنە بەڕووکەش و رواڵەتى دەرەکییەوە ... لەپاڵ ئەوەشدا خۆ چەسپاندن و رەواندنەوەى ئەو ترسەیە کە لەنێو دەروون و مێشکى مرۆڤى کوردا گینگڵ دەدات سەبارەت لەئیدامەکردنى ژیانى ئەمڕۆ و دابینکردنى گوزەرانى ئایندەى خۆى چونکە کۆمەڵگە و رەوشی سیاسی و شپرزەیی و بەڕێوەبردن و ئیدارەکردنى هەرێمى کوردستان جێی متمانە و مسۆگەرى و سەقامگیرى هیچ تاکێک نییە لەکوردستاندا هەر بۆیەشە زۆربەى بەرپرسەکان جگە لەوەى خاوەنى ملیارەها دینارن و لەبانکەکانى هەندەران پاشەکەوتیان کردووە ، خێزان و منداڵەکانیشیان نیشتەجێ و هاوڵاتى هەندەرانن و بگرە لەبەهەشتى نەبڕاوەى رۆژاوادا ژیانى پڕسەروەرى و سەرفرازى دەژین ....!
کۆمەڵگەى کوردى هاوچەرخ ، لەم (دە) ساڵەى دواییەدا موژدەى دوچاربوونى خۆى بە نەخۆشی شیزۆفرینی و دەروونى بە هەموو لایەکمان راگەیاندووە بۆیە ئێمەش وەکو لەشێتخانە و نەخۆشخانەدا بژین وایە ، زۆربەمان گرێی دەروونى و نەخۆشی دەروونیمان لەگەڵدایە زۆربەمان کەسێتییەکەمان ساغڵەم و تەندروست نییە ، بۆیە زۆربەمان راستگۆنین و دزو درۆزن و قۆڵبڕین ، دڵپیس و داوێن پیس و دەست پیسین ، متمانە و بڕوابەخۆ بوونمان بەرەو سەراب ملدەنێ ، قەناعەت و عیزەتى نەفسمان تەسلیم بەدۆلار و دینار کۆکردنەوە کردووە ، پارەمان لەخۆمان و برامان و دایکمان و باوکمان و خوشکمان و خۆشەویستەکەمان خۆشتر دەوێت ... بۆیە ژیانمان بێبەهاو بێنرخە ، بۆیە بەهاى خۆشمان وەک مرۆڤ یەک پوولى قەڵب ناکات ...!.

heme a.rasoel 961@yahoo .com

◄ بگه‌ڕێوه‌ بۆ سه‌ره‌تا