هه‌واڵ

رانیا عەنبەکى : پوورم (وجدان) لەکەرکوک بنکەى ئامادەکردنى ژنە خۆکوژەکان بەرێوەدەبات

سەبارەت بەناوى ئەو ژنە خۆکوژەى کەفەوجى دووى فریاکەوتن لەگەڕەکى ئەلئەمین شارى باقوبە دەستگیرکرد ،چەندین راى جیاواز لەمیدیاکانەوە بڵاو بوونەتەوە و سەبارەت بەدەستگیرکردنیشى چەندین راى جیاواز لەئارادایە .
ئاژانسی مەلەف پرێس رایگەیاندووە کە ژنەخۆکوژەکە ناوى تەواوى رانیە ئیبراهیم موتلیب ئەلتائیە و ماڵپەڕى دیالە تایمس دەڵێت ناوى رانیا ئیبراهیم موتڵەک ئەلعەنبەکیە ، سەبارەت بەدەستگیرکردنیشی سەچاوە ئەمنیەکان هەندێکیان ئاماژە بەوە دەدەن کەرانیا خۆى داوە بەدەستەوە و هەندێکیشیان باس لەوە دەکەن کەئەو ژنە خۆکوژە دەستگیرکراوە.
سەرچاوە رۆژنامەوانیەکانیش باس لەوە دەکەن کەدایکى رانیا (بسعاد سەلمان خەزرەجى) و( وجدان)ى پورى، ژنان بۆ کارى خۆکوژى دابین دەکەن ، هەروەها ئەو دوو ژنە پەیوەندى بتەویان بەرێکخستنەکانى رێکخراوى ئەلقاعیدەوە هەیە لەپارێزگاى دیالە .بسعادى دایکى رانیا لەگەڕەکى ئەلئەمینى شارى باقوبە دادەنیشێت و (ویجدان)ى پوریشى دزەى کردووە بۆ شارى کەرکوک و لەوێ بنکەیەکى دابین کردنى ژنە خۆ کوژەکان بەڕێوەدەبات .
سەرچاوەیەکى ئەمنى دەڵێت لەکاتى دەستگیرکردنى رانیادا هیچ حاڵەتێکى ناسروشتى پێوە دیار نەبووە و لەژێر کاریگەرى ماددە هۆشبەرەکاندا نەبووە و ئەو هەواڵانەشى رەتکردەوە کەدەڵێن رانیا خۆى رادەستى هێزە ئەمنیەکان کردووە.. بۆ لاپەڕە(2)
لەلایەکى ترەوە کێشە کەوتووەتە نێوان هێزەکانى ئەمریک و هێزە ئەمنیەکانى پارێزگاى باقوبەوە کە داوایەکى ئەمریکیەکانیان رەتکردووەتەوە سەبارەت رادەستکردنى رانیا بەهێزەکانى ئەمریکا ، بەڵام دواتر هێزە ئەمنیە عێراقیەکان قایل بوون بەوەى تەنها بۆ ماوەى 48 کاتژمێر رانیا رادەستى ئەمریکیەکان بکەن .
هەمان سەرچاوە ئاماژە بەوەدەدات کەرانیا دانیشتووى گوندى (ئەبو کەرمە)یە و ماوەیەکى کەمە شووى بە خزمێکى خۆی کردووە کەناوى محمەد حوسین ئەلدلێعیە و ئەویش دانیشتووى گوندى( ئەلموخێسە) یە و لەلێکۆلینەوەکاندا دەرکەوتووە پشتێنە بۆمبرێژکراوەکەى بۆ رانیا بەستووە و تاکو لەناو گردبوونەوەیەکى پۆلیسەکاندا لەخاڵێکى پشکنینى شارى باقوبەدا بیتەقێنێتەوە .
دواى دەستگیرکردنى (رانیا)ش هێزێکى ئەو فەوجەى کە دەستگیرى کرد ، هەڵیان کوتایە سەر خانوویەک کەئەو خێزانە بۆ کارە خۆکوژیەکان لەگوندى (توم ئەلعیزام) بەکرێیان گرتبوو، لەو هەڵمەتەشدا دایکى رانی و سێ پورزاى دەستگیرکران کەسەرقاڵى بەستنى بشتێنى بۆمبڕێژکراو بوون .
جێی وتنە باوکى رانیاش پێشتر لەکردەوەیەکى خۆکوژیدا بەر لەدوو ساڵ خۆى لەنزیک سەرۆکى شارەوانى ناحیەى (ئەبی سەیدا) تەقاندەوە لەئاکامى ئەو کردەوە خۆکوژیەشدا (شێخ رەعەد ئەلسرێوە) سەرۆکى شارەوانى ناحیەکە و هەشت لەکوڕ و پاسەوانەکانى کوژران .
سەبارەت بەدیاردەى ژنە خۆکوژەکان (سەجا ئەلقەدورى) ئەندامى لیژنەى ئەمنى لە ئەنجومەنى پارێزگاى دیالە ئاشکراى کردوە کە "ئەو ژنە خۆکوژانە لەیەک کاتدا (شو) بەچەندین پیاو دەکەن و لەهەموو حاڵەتەکانیشدا باوکى منداڵەکانیان ناناسن و دواتر بەهۆى بێئومێدبوون و هەژارى و ترسەوە ئیستیغلال دەکرێن بۆ ئەنجامدانى ئەو جۆرە تاوانانە " .

◄ بگه‌ڕێوه‌ بۆ سه‌ره‌تا