هه‌واڵ

زێبارى قایل نابێت فەرماندە کوردەکانى لیواکانى موسڵ و کەرکوک لاببرێن و (زوبەیدیش) دەکرێتە سەرکردەى فیرقەکەى کەرکوک

سەرچاوەیەکى سەربازى بەرز کە نەیویست ناوى ئاشکرا بکرێت بە (هەواڵ)ى راگەیاند لەچوار چێوەى هەوڵ و پلانەکانى لایەنە سیاسیەکانى ناوحکومەتى عێراق بۆ کەمکردنەوەى رۆڵى سەرکردە سەربازیە کوردەکانى ناوسوپا ، وەزارەتى بەرگرى عێراق بەنیازە پێنج کوردى سەرکردە لەسوپاى عێراقی لەموسڵ لاببات و لەدواى سەردانەکەىوەزیرى بەرگریش بۆ کەرکوک فەرمانى داوە ژمارەیەک ئەفسەرى پلە بەرزى کورد خانەنشین بکات و هەندێکیشیان بۆ شارەکانى تر بگوازرێنەوە و فیرقەیەکى نوێش لەشارەکە دابمەزرێت کەئەفسەرێکى عەرەبی شارى (حلە) سەرکردایەتى دەکات .
لەسەرئاستى کەرکوک دەنگۆى ئەوە لەئارادایە کە ئەو فیرقەیەى دادەمەزرێت کە سەرجەم ئەفسەر و سەربازەکانى عەرەب دەبن و سەرکردە سەربازیە کوردەکانى کەرکوکیش لادەبرێن .
سەرچاوە سەربازیەکەى (هەواڵ)یش وتى " بابەکر زێبارى سەرۆکى ئەرکانى سوپاى عێراق قایل نیە لەسەر لابردنى ئەفسەرە کوردەکانى موسڵ واژۆ بکات لەبەر ئەوەى هیچ پاساوێک بۆ لابردنیان نیە" .
جێی وتنە :کەناڵى (الشرقیە) کە سەعد بەزازى کۆنە راوێژکارى عودەى کورى سەدام بەرێوەى دەبات لە راپۆرتێکدا باسى لە ناکۆکى قووڵى نێوان سەرۆک وەزیران نورى مالیکى و تیمى سەربازى کوردى کرد لە وەزارەتى بەرگرى عێراقیدا لەدواى رووداوەکانى خانەقین و کێشەى ئەفسەرە کوردەکان و هێزى پێشمەرگە ، بەڵام سەرچاوەکەى هەواڵ بوونى ئەو ناکۆکیانەى رەتکردەوە .
هاوکات بە پێى زانیارییەکانى هەواڵ سەرکردەى فیرقە سەربازیە نوێیەکەى کەرکوک ناوى ( عەبدولئەمیر رەزا ئەلزوبێدیە )و لە شیعەکانى شارى حللەیە و لەسەردەمى حکومەتى بەعسدا لە بارەگاى فەیلەقى یەک لە کەرکوک ئەفسەر بوە .
سەرچاوەیەکى سەربازى لە کەرکوک ئەو هەواڵەى پشتراستکردەوە و جەختیشى لەوەکرەوە کە فیرقەى (12) لە دوو لیواى فیرقەى چوار کە لە تکریتەو لە دوو لیواى نوێ پێکدێت . سەرچاوەکە وتیشى کە ئەو بریارە دواى سەردانەکەى عەبدولقادرلعوبێدى هات بۆ شارى کەرکوک و پاش گەرانەوەى بۆ بەغدا ژمارەیەک فەرمانى لەو بارەیەوە دەرکردووە لەوانە دامەزراندنى فیرقەى(12) و گواستنەوەى فەرماندەى لیواى (15) بۆ دیالەو خانەنشینکردنى (عەمید روکن باسم دزەیى فەرماندەى بنکەى مەشقى کەرکوک و عەمیدى روکن یونس زێبارى سەرکردەى یەکەى پشتگیرى ) .
بەپێى سەرچاوەیەکى باوەر پێکراو زیاتر 50%ى سەربازەکانى سوپاى عێراق لە کەرکوک بە نەتەوە عەرەبن .

◄ بگه‌ڕێوه‌ بۆ سه‌ره‌تا