هه‌واڵ

ئەو حیزبانەی لە کۆنگرەی پێنجەمی بەرەى تورکمانى پاشەکشێیان کرد
بەرەیەکی نوێ پێکدەهێنن

رۆژی دووشەممەی رابردوو کۆنگرەی پێنجەمی بەرەی تورکمانی کۆتایی هات و لەمیانەی ناڕەزاییەکی زۆری هەندێک لە حیزب و کەسایەتیە تورکمانەکان سەعدەدین ئەرگێچ بۆ خولی دووەمی سەرۆکایەتی بەرەی تورکمانی هەڵبژێردرایەوە .
بەر لەدانیشتنی یەکەمی کۆنگرەی پێنجەم رۆژی یەک شەممە حیزبی (قەرار)ی تورکمانی کە فاروق عەبدولڕەحمان سەرۆکایەتیی دەکات لە کارەکانی کۆنگرە پاشەکشێی کردو حیزبی ناوبراو لیژنەی ئامادەکاری کۆنگرەی پێنجەمی بەرەی تورکمانی بەلایەنگیری و دەستەگەری لە بەرژەوەندی سەعدەدین ئەرگێج تاوانبار کرد وێڕای هەوڵەکانی بۆ پەراوێزخستنی رۆڵی حیزبی قەرار.
ئێوارەی رۆژی یەکەمى کۆنگرەکەش نوێنەرانی تەلەعفەرو موسڵ لە کۆنگرەکە کشانەوە ، وەک ناڕەزایی دەربڕین لە پەراوێز خستنیان لەلایەن لیژنەی سەرپەرشتیکردنی هەڵبژاردنەکانەوە .
لەلایەکی ترەوە حیزبی تورکمان ئیلی کە بەیەکێک لە دیاریترین حیزبەکانی نێو بەرەی تورکمانی دادەنرێت ، ئیدانەی سەرپەرشتیارانی هەڵبژاردنەکەى کرد بەوەی لایەنگیری کوتلەی ئەرگێچ بوون و ئەم حیزبە دیارەی تورکمانەکانیش لە کۆنگرەکە پاشە کشێیان کرد .
لەبەیاننامەیەکی رۆژی 15 /7 /2008دا حیزبی تورکمان ئیلی رایگەیاند کە دان بەدەرەنجامەکانی کۆنگرەکەدا نانێت و هەریەک لە (مستەفا زیائی ، کە لە ئەنکەرە دادەنیشێت و راوێژکارە لەوەزارەتی دەرەوەی تورکیا - بەشی تورکمانەکانی عێراق و سەعدەدین ئەرگێچی بە بەرپرسیار دانا لە هەرەسهێنانی کۆنگرەی پێنجەم .
تورکمان ئیلی ئەوەیشی راگەیاند کە کاردەکات بۆ پێکهێنانی کۆمسیۆنێکی ئامادەکاری بۆ هەڵبژاردنی ئەنجومەنی نەتەوەیی تورکمان و هاوکات لەدژی ئەو جیاوازیکردنەیە کە سەرانی بەرەی تورکمانی پەیڕەوی دەکەن .
لە کۆنگرەی پێنجەمی بەرەی تورکمانیدا سەعدەدین ئەرگێچ بەزۆرینەی دەنگەکان بەسەرۆکی بەرە هەڵبژێردرایەوە ، ئەویش بە بەراورد لەگەڵ (حەسەن تۆران)ی حیزبی دادی ئاراستە ئیسلامی سوننە مەزهەب ، هەروەها (یوسف بەیرەقدار) بەسەرۆکی ئەنجومەنی تورکمانەکان هەڵبژێردرا لەبەر نەبوونی کاندیدی رکابەری ، بۆ نووسینگەی جێبەجێکردنی بەرەیش هەریەک لە (عەلی هاشم موختار ئۆغڵو) لە تکریت و (ئوسامە نازم ) لە دیالەو (ئایدن ئەقسو) لەبەغداو موقەدەم (نەزهەت ) لە هەولێرو لە کەرکوکیش بۆ هەمان نووسینگە (ئەمین غەریب ئەندازیاری کشتوکاڵ ) و(ئەرشەد ساڵحی نوێنەری بەرە لە سوریا ) و دکتۆر (شابەندەر عزەت ) هەڵبژێردران .

◄ بگه‌ڕێوه‌ بۆ سه‌ره‌تا